Шығыс Қазақстан облысында алғаш рет «Атамекен» ҚР ҰКП президиумы жанындағы Іскер әйелдер кеңесі мен оның ШҚО бойынша өңірлік филиалының «Аруана» бизнесте танылу» сыйлығымен марапаттау рәсімі өтті. Көкпекті ауданының «Көкпекті жолдары» ЖШС директоры Гүлназ Нұрғалиева әйелдер кәсіпкерлігі тиімділігінің үздік тәжірибесі үшін бас марапатқа ие болды.
2000 жылы Құдайберген Нұрғалиевтің қолға алуымен құрылыс-жөндеу жұмыстарының барлық спектрін орындау үшін «Көкпекті жолдары» ЖШС құрылды, ал қызметінің негізгі бағыттары автомобиль жолдарын жөндеу, салу және пайдалану болды. Осы сәттен бастап Көкпекті ауылындағы жолдарға қыста және жазда кәсіпорынның арнайы техникасы қызмет көрсетеді. Кәсіпкердің өзі жерлестерінің арасында құрметке ие болды, ал 2010 жылы оның қызы Гүлназ ЖШС-нің жұмысын қабылдап алды.
Бүгін кез-келген Көкпекті тұрғыны Гүлназ Құдайбергенқызы – өз ауданының ең құрметті кәсіпкерлерінің бірі екенін айтады. Ал ШҚО Кәсіпкерлер палатасы мен ШҚО бойынша «Атамекен» ҰКП Іскер әйелдердің өңірлік кеңесінде оны бүкіл Шығыс Қазақстанның ең лайықты бизнесвумендерінің бірі деп санайды. Оның басқару қызметінің нәтижесінде 2013 жылы ҚР СТ ИСО 9001-2009 талаптарына сәйкес сапа менеджменті және экологиялық менеджмент жүйелері ойдағыдай әзірленді, енгізілді және сертификатталды. Кәсіпорын қызметкерлері тиісті жұмыстарды жүргізу кезінде қажетті машиналар мен механизмдерді басқару санаттары бойынша диплом алды, жергілікті атқарушы органдар тарапынан бірнеше рет марапаттарға ие болды.
Осы жылдар ішінде Гүлназ Нұрғалиева өз қызметкерлеріне және ауданның барлық тұрғындарына жоғары әлеуметтік жауапкершілік танытып келеді. Ол жас мамандарды кәсіптік-техникалық колледждерде түрлі құрылыс және техникалық мамандықтар бойынша оқытуға жәрдемдеседі. Бірнеше рет қызметкерлерді емдеу шығындарын өз мойнына алды, оларды тұрғын үймен қамтамасыз ету үшін үйлер салды, жыл сайын жем-шөппен және көмірмен қамтамасыз етеді.
Кәсіпкер аудан тұрғындарына, әсіресе Көкпекті ауылдық округ тұрғындарына «Мектепке жол» акциясы аясында бұқаралық іс-шараларды өткізуге демеушілік көмек көрсетеді және жағдайы нашар отбасылардан шыққан балаларға материалдық көмек көрсетеді, жыл сайын Жеңіс күніне орай Ұлы отан соғысының қатысушыларына және тыл ардагерлеріне сыйлықтар беруге қаражат жинауға қатысады, әр түрлі деңгейдегі жарыстарға қатысатын аудан спортшылары үшін демеуші болады. Аудандық Іскер әйелдер кеңесінің мүшесі ретінде ауданның қоғамдық-саяси, мәдени және спорттық өміріне белсене араласып, 2021 жылдың қаңтар айында Nur Otan партиясының атынан аудандық мәслихаттың депутаты болды.
Сонымен қатар Гүлназ Құдайбергенқызы – үш баланың анасы және рухы мықты әйел. «Нәзік жас әйелдің бизнес жүргізіп жатқанын көру өте қуанышты. Ал бизнес жеңіл емес – жолдарды салу және жөндеу, битум өндіру, аз қамтылған және көп балалы отбасыларға арналған үйлер салу. Әр еркектің қолынан келе бермейді бұл! Сондай-ақ, Гүлназ Шайжүнісов атындағы мектептің жанында демалыс саябағын салды, өйткені оның әкесі еңбек сіңірген жол жөндеуші болған және осы мектепте оқыған», – деді ШҚО Кәсіпкерлер Палатасы директорының орынбасары Әлия Мұқашева.
Гүлназ Нұрғалиеваның осы және басқа да көптеген еңбектері Қазақстанның әйелдер бизнес-қоғамдастығының назарынан тыс қалған жоқ. Белсенді өмірлік ұстанымы, өңір мен ел экономикасының дамуына қосқан жеке үлесі, кәсіпкерлікті дамытудағы елеулі нәтижелері және жоғары әлеуметтік жауапкершілігі үшін «Аруана» сыйлығымен Гүлназды марапаттауға ШҚО бойынша «Атамекен» ҚР ҰКП Іскер әйелдер Өңірлік кеңесінің төрайымы Елена Березинская-Абилова, ШҚО Кәсіпкерлер Палатасы директорының орынбасары Әлия Мұқашева, сондай-ақ мектеп киімін тігумен айналысатын және Көкпекті ауданында жеңіл өнеркәсіпті дамытуға бастама беруді жоспарлап отырған облыс орталығынан кәсіпкер Залина Батылғазина келді. Қуанышты оқиғамен кәсіпкер Көкпекті ауданының әкімі Серікқазы Сәдуақасов, ШҚО Кәсіпкерлер Палатасы Көкпекті аудандық филиалының директоры Бауыржан Артықпаев бөлісті.
18 қаңтар Гүлназ Нұрғалиева үшін қос мереке болды – бұл күні оның туған күні екен.
«Кешегі оқиға мені ризашылыққа бөледі. Тек мен үшін ғана емес, бүкіл аудан үшін бұл үлкен артықшылық болды, өйткені бұл бірінші марапат және оны біздің Көкпекті ауданының кәсіпкері алды.
Сондықтан жерлестерім де мені мақтан тұтады. Менің ойымша, қазір менде екі есе, тіпті үш есе үлкен жауапкершілік бар: осы марапатқа ие бола отырып, мен тоқтамаймын. Оның үстіне мен аудандық мәслихаттың депутаты болдым, бұл да мен үшін үлкен қадам. Егер бұрын мен өз жұмысыммен айналысатын болсам, қазір қоғамдық қызметпен белсенді айналысамын. Облыс атынан осындай марапатқа үміткер Іскер әйелдер кеңесінің мүшесі ретінде ауданымызда әйелдер кәсіпкерлігін дамытуға бар күшімді саламын», – деп өзінің алған әсерімен және жоспарымен бөлісті.
Сондай-ақ, іс-шара барысында Көкпекті ауданы әкімінің ынталандыру грамоталарымен кәсіпкер Раушан Нұрғалиева, Бибінұр Мурсалимова, Зухра Қалиева, Валентина Гранкина, Толқын Сапарова, Надия Айдарова марапатталды.
«Кәсіпкер әйелдер үшін бұл марапат олардың бизнес-бастамаларын жүзеге асырудағы жоғары әлеуметтік жауапкершілігінің нәтижесі болып табылады. Гүлназ Нұрғалиеваның «Аруана» бизнесте танылу» сыйлығының лауреаты болуы Көкпекті ауданы үшін өте маңызды.
Дорошенко Х. Истории предпринимателей Восточного Казахстана [Электронный ресурс] : [биография предпринимателя Г. Нургалиева] . – Режим доступа: https://www.facebook.com/groups/502266254367589 (Дата обращения 09.02.2022)
