Шәрбану Бейсенова – жазушы, журналист, аудармашы, Қазақстан Жазушылар Одағының мүшесі.
1947 жылы Шығыс Қазақстан облысы, Ұлан ауданында туған. 1969 жылы əл-Фараби атындағы Қазақ Ұлттық университетін тəмамдаған. Еңбек жолын 1968 жылы қазіргі «Парасат» (бұрынғы «Мәдениет және тұрмыс») журналында әдеби қызметкер ретінде бастап, кейіннен бөлім меңгерушісі болған. 1980 жылдан бастап «Қазақстан әйелдері» журналына бөлім меңгерушісі, Қазақстан Республикасы Ақпарат министрлігінің Баспа істері жөніндегі департаментінде бас маман, «Қазақ әдебиеті» газетінде «Кітап әлемі» қосымшасының редакторы қызметін атқарған.
Шығармашылыққа жастайынан ден қойған танымал жазушының алғашқы тырнақалды әңгімелері, новеллалары облыстық «Дидар» (бұрынғы «Коммунизм туы») газеті мен «Қазақстан әйелдері» журналында тұрақты жарияланып тұрды.
– «Мен бала күнімде өзге ұлт өкілдері көбірек қоныстанған Өскеменде өстім. Сол өткен ғасырдың алпысыншы жылдары шаһарда Жамбыл атындағы жалғыз қазақ мектеп-интернаты болды, сонда білім алдым. Біз оқып жүрген кезімізде мектебімізге облысқа келген ақын-жазушылар міндетті түрде бас сұғып, оқушылармен жүздесетін. Солай мен мектеп қабырғасынан қазақтың айтулы қаламгерлерінің есімдерін біліп, ғибратты әңгімелерін тыңдадым. Осы жылдары облыстық газетте – Мүсілім Құмарбекұлы, Серік Ғабдоллаұлы, Тоқтарбек Қызықбайұлы, Кеңесхан Зәкенов секілді қаламы жүйрік ағаларымыз еңбек етті. Бұл кісілер де алтын ұямызға келіп, кездесулер өткізетін. Соның да ықпалы болар, енді өзім де шағын әңгіме, новелла жаза бастадым. Осылай жазғандарым газет бетінде жарық көріп жүрді. Алғашқы көңілімнен шыққан әңгімем – «Ақбота» деп аталады. Бұл облыстық газетте жарияланды» – деп еске алады жазушы. Жазушының шығармаларында табиғат сұлулығы, туған жердің жүрекке ыстық келетіндігі туралы оларды толғандыратын суреттер әр жерде қылаң беріп, кейіпкердің жан дүниесін толықтырып отырады. Туған жер табиғатынан алынған пейзаждар жазушының хикаяттарынан басқа «Тылсым», «Туған жердің түтіні», «Мақтақыз», «Бәкене қыз» әңгімелерінде де кездеседі.
Ол төл туындыларымен қатар аудармамен де айналысады. Украин жазушысы В.Дроздың, эстон жазушысы Е.Ермановтың, әзірбайжан жазушысы Анардың, латын жазушысы Д.Рукшаненің, армян жазушыларының жекелеген шығармаларын, X.Андерсеннің ертегілерін, латиноамерикандық қаламгер Ж.Амадудың «Құм жағалаудың капитандары» атты романын қазақ тіліне аударған.
Халықаралық «Алаш» әдеби сыйлығының лауреаты Шәрбану Бейсенованың «Туған жердің түтіні» әңгімесі, «Звено Алтая» әдеби бірлестігінің ұйымдастыруымен жарық көрген Шығыс Қазақстан облысы жазушыларының «Солнечный круг» атты балаларға арналған әңгімелер, өлеңдер мен ертегілер жинағына еніп отыр.
